පාසලේ පොත්ගුලට වටිනාකමක් එකතුකරමු.
අවිවේකි ජිවිතයට එක්තැන් වු මිනිසා කායික මෙන්ම මානසික වශයෙන් මහත් පීඩාකාරී බවකින් පිරි ජීවිතයක් ගත කරයි. නමුත් මිනිසා මානසික වශයෙන් යම් මොහොතකට හෝ අස්වැසිල්ලක් ලබා ගැනීමට විඩාබර දවසේ කාලරාමුව තුල මංපෙත් සොයාලමින් සැරිසරයි. මිනිසාට මානසික වශයෙන් නිරෝගීතාවයක් ලබා දෙන පොතපත කියවිම ළමා වැඩිහිටි කවුරුත් යොමු වුයේ මෙහි ප‍්‍රතිඵලයක් ලෙසිනි. සාක්ෂරතාව අතින් උසස් මට්ටමක සිටින ජනතාවක් සිටින අප රටේ කාලයක සිට පැවති පොතපත කියවීමේ පුරුද්ද ඇති කරන ප‍්‍රධාන ආයතනයක් ලෙස පුස්තකාලය හදුනාගත හැකිය. මෙහි දී පාසලට මුලිකත්වයක් ලබා දෙන අතර පාසල් සිසුන්ට අධ්‍යාපනයක් ලබා දිම මෙන්ම කියවීමට රුචිකත්වයක් ඇති කිරීම උදෙසා පාසලේ දැනුමේ කෝෂ්ඨාගාරය හෙවත් පුස්තකාලය ප‍්‍රධාන මෙහෙවරක් ඉටුකරනු ලබයි. විවිධ ජනමාධ්‍ය ඔස්සේ අතොරක් නැතිව ගලා එන නව දැනුම පුද්ගලිකව සිය ග‍්‍රහනයට හසුකර ගැනීමට නොහැකි තරම් විශාල වීම මත එම කර්තව්‍යය ඉටු කර ගැනීමට කාර්යක්ෂම සංවිධානයක පැවති අවශ්‍යතාවය මත බිහිවන මෙම පුස්තකාලය නම් ආයතනික සංකල්පය පාසල තුල ප‍්‍රධාන වශයෙන් දැනුම එක්රුස් කල ගබඩාවක් වැනිය. අතීතයේ සංරක්ෂණාගාරයක් ලෙස කටයුතු කල පුස්තකාලය පාසල් භූමිය තුල සිසුන්ගේ විශ්ව ඥානය එක්රැස් කරන, සංවිධානය කරන හා බෙදාහරින ආයතනයක් ලෙස හදුනා ගත හැකිය.
මානව ශිෂ්ටාචාරයේ ආරම්භයේ සිටම එක් පරපුරක් සතු දැනුම තවත් පරපුරක් වෙත උරුම කරමින් සමාජ සේවයක් ඉටු කරන ආයතනයක් ලෙස පුස්තකාලය හැදින්විය හැකිය. පාසල තුලින් විෂයානුබද්ධ දැනුමක් මෙන්ම දරුවන්ට හොද සිරිත්, විරිත්, ආචාරධර්ම, සාරධර්ම හුරුකරවන්නා සේම කියවීමේ රුචිය ඇති කරමින් දරුවාට ඉහත පුරුදු ඇති කරලන්නට පුස්තකාලය නම් මහා පොත්ගුල ප‍්‍රධාන කාර්යබාරයක් ඉටු කරයි. පාසලක මුලික ආයතන පද්ධතියට පුස්තකාලයේ අවශ්‍යතාවය ප‍්‍රධාන වශයෙන් දැනෙනුයේ මෙම මෙහෙවර නිසාය. පාසල තුල සිසුන් තම ගුරුවරුන්ගෙන් ලබා ගන්නා දැනුම් සම්භාරය තව තවත් පෝෂණය කර ගැනීමට මෙන්ම තම බුද්ධි වර්ධනයට පුස්තකාලයෙන් ලබා ගන්නා ප‍්‍රයෝජනය මෙතකැයි මිලකල නොහැකිය. අතීතයේ මැටි පුවරු මත සනිටුහන් වු තොරතුරු පොත පත මත ලේඛන ගත වීමත් සමග අතීත දැනුම ආරක්ෂිතව අනාගතයට දායාද කිරීමට අවස්ථාව ලැබී ඇත. නමුත් අධ්‍යාපන කි‍්‍රයාවලියේ නිරත වන මෙරට සිසුන් පෙරකල දැනුම සොයන්නට පැවති උනන්දුවවත් නොමැති වීම කණගාටුවට කරුණකි. පාසල තුල පවතින පුස්තකාලයේ පොතපත භාවිතයට ගන්නවා වෙනුවට ඒ මත මකුළුන්ගේ රජදහනක් බවට පත් වන්නට දී හිස් මොළ පුරවාගෙන සිටින පාසල් සිසුන් අනාගත පරපුරට දායාද කරන්නට මාන බලන්නේ හිස් පිටු සහිත පොතක් වන්නට පුළුවනි. අදවන විට පුස්තකාලය පාසල තුල සිසුන් භාවිත කරන්නේ පාසල් පේ‍්‍රමයේ නවාතැන්පලකට පමණි. දොඩමළු වීමට නිදහස සොයන පාසල් සිසුන් ගුරුවරුන්ගේ දෑස් මානයෙන් මිදී කල්ගත කරන්නට පුස්තකාලය භාවිතා කරනවා මිස එහි දැනුම පිරික්සීමට උත්සහ නොකරයි. නමුත් මෙය පාසල තුල ප‍්‍රමිතිගත කලයුතු ආයතනයකි. සිසුන්ගේ අවධානය මෙයට වඩා පොතපත කියවීමට හුරු කිරීම ගුරුවරුන්ගේ ද යම් මට්ටමකට පැවරෙන කාර්යබාරයක් වේ. කුඩා, ලොකු කුමන පාසලක වුවද පුස්තකාලයක් පාසල තුල පවතින පහසුකම් මත හෝ ගොඩනගමින් අධ්‍යාපන කි‍්‍රයාවලිය මෙයට වඩා විධිමත් කි‍්‍රයාවලියක් මත සිදුකිරීමට උත්සහ කිරීම ඉතාමත් වැදගත් වේ.
ශ්‍රී ලංකාවේ පවතින නිදහස් අධ්‍යාපන ක‍්‍රමය හේතුවෙන් ඉහල ශාක්ෂරතාවයක් පවතින රටක් ලෙස හදුන්වා ඇත. එසේ වුවද කියවීමේ ප‍්‍රවණතාවය අඩුය. පාසල් සිසුන් තුලින් මෙම ගැටළුවට විසදුම් කි‍්‍රයාත්මක කිරීම මත අනාගත පරපුර හෝ සුරක්ෂිත වන්නේය. මෙම පුස්තකාල පරිහරණය සිසුන් මතින් අවම වන්නට බලපාන හේතු සාධක අතර උපකාරක පංති, රූපවාහිනිය මෙන්ම නවීන මාධ්‍ය හේතු වන්නා සේම පාසල් පුස්තකාලයන්හි ප‍්‍රමිතිය ගිලිහී යාමත්, යාවත්කාලීන නොකර එකතැන රාක්කකර පවතින පොත් කිහිපයකින් පාසල් පුස්තකාලය පැවතීමත් මුලික වේ. නුතනයත් සමග තරගකාරී අධ්‍යාපන කි‍්‍රයාවලියක නිරත වන සිසුන්ට එයට අවශ්‍යය කරන කාලීන පොතපත ද තම පුස්තකාලය තුලින් සිසුන් බලාපොරොත්තු වුවද වර්තමාන පාසල් පුස්තකාලයන්හි මෙම කාර්ය සිසුන්ට ඉටු කරගැනීමට නොහැකි වී ඇත. එම නිසා මහජන පුස්තකාලයන් වෙත ඇදී යන සිසුන් පාසල තුල පවතින පුස්තකාලයට වැරදිමකින් හෝ ගොඩවීමට නොසිතයි. සාක්ෂරතාව තිබු පමණින් සිසුන් කියවිමට පෙලෙඹි යැයි සිතීම වැරදි කල්පනාවකි. එය ඔවුන් තුලින් ආයාසයෙන්ම ගොඩනැගිය යුතු දෙයක් වේ. පාඨකයා පුස්තකාලයේ හොදම මිතුරෙකු ලෙස සලකන අතර පලමුව පුස්තකාලය පාඨකයා වෙත පැමිණිය යුතුය. හදවතට සමීප වු විට පාඨකයා ඒ වෙත පියමනින්නට අමතක නොකරයි.
තම පාසලේ පුස්තකාලය ගොඩනැගීමට එහි සිටින සියලූ පුද්ගලයන්ට වගකීමක් පවති. පුංචි දෙයකින් තමන්ටත් ඒ වෙනුවෙන් යමක් කලහැකි බව සියලූදෙනාගේ සිත් තුලට දැනිය යුතුය. තම ජිවිතයේ සුවිශේෂි දිනයකට පුස්තකාලයට යමක් පරිත්‍යාග කල හැකිනම් එය කොතරම් වටින දෙයක් වන්නේද. පාසලේ සිසුන්ට තම උපන්දිනයට එක් පොතක් තම පාසලේ පුස්තකාලයට පරිත්‍යාග කිරීම, ගුරුවරුන්ට ද තමාට හැකි යම් අවස්ථාවක හෝ තම පුස්තකාලයට පොතක් පරිත්‍යාග කරන්නට හැකි නම් ඒ පුංචි දැනුමැති කෝෂ්ඨාගාරය විශාල පුස්තකාලයක් බවට පත් කරන්නට බැරිකමක් නැත. තම පාසලේ පුස්තකාලයට වටිනාකමක් එකතු කරමින් එය ගොඩනගන්නට එයට උචිත උපායන් නිර්මාණය කර ගැනීමට පාසලේ අධ්‍යාපන ලබන්නන් වශයෙන් උත්සහ කලයුතුය. අපේ රටේ සිසුන් ගෙන යායුත්තේ ගුණාත්මක කියවීමකටය. සිසුන් කියවන්නේ නැති පිරිසක්නම් ඔවුන්ට පමණක් දොස් නැගීම පලක් නැත. පාසල් පුස්තකාලයේ සිට එය නැති කිරීම ආරම්භ කල යුතුය.එම නිසා තම පාසලේ පුස්තකාලය ද මකුළු රජදහනක් වන්නට හැර බලා නොසිට එහි නිසි ඵල ලබා ගැනීමට උත්සහ කරන්නන් අධ්‍යාපන කි‍්‍රයාවලියේ මෙන්ම ජීවිතයේ ද සාර්ථක ගමනාන්තයක් එළිපෙහෙලි කරගනී.
